Durante tres fin di siman di akshon durante promé tres siman di desèmber, un total di 132 ton di desecho a wordu kolektá na Boneiru komo parti di kampaña Bario Limpi. E último ronda di akshon, ku a tuma lugá di 19 te ku 21 di desèmber, a resultá den 38 ton di desecho kolektá.

Bario Limpi tabata un inisiativa di Direktorado di Supervishon i Mantenshon di Lei di Openbaar Lichaam Bonaire (OLB), den kolaborashon ku Selibon NV. Durante e kampaña, habitantenan a por a hasi uso di konteiner temporal pa desecho ku a keda pone den diferente bario. E esfuerso kolektivo aki a yuda pa hasi barionan mas limpi i ordená.

E resultadonan ta mustra ku Nikiboko (Nort i Suit huntu) tabata e bario ku a kolektá mas desecho, ku un total di 27,4 ton. Tambe bario manera Tera Kòrá (23 ton) i Amboina (18,8 ton) a hasi un kontribushon grandi di desecho durante e kampaña.

Despues di terminá e kampaña, Selibon NV a limpia kompletamente tur lokashon kaminda e konteiner nan tabata, pa laga e espasio públiko na un bon estado bèk.

Segun Sherman Blanken, hefe di Proyektonan di Handhaving & Taskforces, e kampaña ta mustra ku partisipashon di  komunidat tabata grandi. OLB lo evaluá e posibilidat pa organisá e kampaña Bario Limpi mas frekuente den futuro.

Advertisement