Papiamentu
Un hòmber di nashonalidat hulandes ku a pèrdè den mondi di Bolivia na Boneiru djabièrnè anochi a ser reskatá despues di un operashon di búskeda ku yudansa di un helikòpter di Wardakosta.
Sentro di Operashonnan Marítimo (MOC) di Wardakosta a risibí un yamada di emergensia for di Kuerpo Polisial Hulanda Karibense (KPCN). Segun informashon, e hòmber a tuma kontakto ku polis despues ku el a pèrdè kaminda ora e tabata kana den e área di mondi.
Afortunadamente e hòmber tabatin su telefon kargá huntu kuné, loke a permití’e yama pa informá polis tokante su situashon. El a indiká ku su awa pa bebe a kaba i ku e tabata sinti su mes hopi nervioso den e mondi skur i denso yen di palu.
Despues di risibí e mensahe, Wardakosta a manda un helikòpter pa Boneiru pa asistí den e operashon di búskeda. Polis tabata presente den e área tambe.
Durante e operashon, e hòmber a ser lokalisá rapidamente ku yudansa di e helikòpter. Despues di ser haña, a transporté pa aeropuerto, kaminda el keda entregá na polis. No a reportá ningun herida grave.
Kargando komentarionan...