Violashon di orario di sera den establesimentu di hóreka

Den oranan di mardugá di djadumingu 15 di mart, alrededor di 3.20 or, polis a konstatá ku tabatin vários persona pegá ku un establesimentu di hóreka den ‘Centrumgebied’.

Despues di un investigashon a resultá ku e negoshi tabata sirbi kuminda na kliente. Debí na violashon di e orario di sera, e establesimentu lo haña un prosès-verbal pa violashon di Lei di Bebida i Hóreka BES (de Drank- en Horecawet BES).

Kòntròl riba violashon di Lei di Opio

Den oranan di anochi di djabièrnè 13 di mart, polis a tene kòntròl dirigí riba violashon di Lei di Opio na altura di un establesimentu di hóreka situá na Kaya Monseigneur Nieuwindt.

Durante patruya, e agentenan a sinti un holó fuerte di supstansia probablemente narkótiko prosedente for di personanan na e sitio. P’esei a opta pa tene un kòntròl dirigí riba e personanan presente na e sitio i listra vehíkulonan.

Aki a konfiská un kantidat chikitu di supstansia probablemente narkótiko i un ‘grinder’.

Bròmer konfiská despues di persekushon

Den oranan di anochi di djabièrnè 13 di mart, polis a risibí vários notifikashon tokante molèster di zonido duru di un bròmer den Kaya Grandi i bisendario. Na yegada di polis a topa ku e bròmer den akshon. E shofùr no a para di kua a surgi un persekushon kòrtiku ku a terminá na Kaya Tintorero den Antriol.

E shofùr no por a mustra un reibeweis ni seguro bálido. Alabes e no tabatin hèlm bistí. A dun’é but pa e infrakshonnan menshoná i a konfiská e bròmer. A transportá e vehíkulo pa warda di polis.

Advertisement