Kuerpo Polisial Hulanda Karibense (KPCN) a reportá riba un seri di evento ku a tuma lugá riba Boneiru den e último dianan entre 16 i 18 di mart, inkluyendo un persekushon ku a kaba ku konfiskashon di un skuter, aksidente di tráfiko, detenshonnan i kontrolnan riba lei di tráfiko.

Skuter keda konfiská despues di huida

Riba djamars 17 di mart, mas o ménos 5:40 di atardi, polis a nota un skuter riba Kaya Nikiboko Sùit. Ora e persona a mira polis, el a trata di laga e lugá sin para. Despues di un persekushon kòrtiku, e persona a pèrdè balansa i a kai riba Kaya Erebato.

E no a sufri herida. Ora polis a kontrol’é, a sali na kla ku e shofùr ta menor di edat i no tabatin reibeweis. Tambe e no a por mustra papelnan di seguro, I tabata usando un plachi di number falsifiká i no a sigui e señal di polis pa para. El a risibí but pa e infrakshonnan i a konfiská tantu e skuter komo e plachi.

Aksidente entre dos vehíkulo

Mes dia, rondó di 5:15 di atardi, polis a atendé un aksidente riba Kaya Korona kaminda dos outo a aksidentá. Un di esnan envolví a reportá doló i ambulans a hib’é pa hospital pa evaluashon.

E otro shofùr a resultá di no tin seguro bálido i a haña un but. Durante e prosedura standart di ‘botsen is blazen’, a hasiprueba di alkohòl ku tur dos shofùr i no a haña indikashon di uso.

Polis ta pone enfoke riba plachinan ilegal

Segun KPCN, últimamente tin un subida den kaso di vehíkulonan ku no ta kumpli ku regulashonnan di plachi di number. Esaki ta inkluí outonan ku tin un solo plachi òf ku ta usa plachinan falsifiká.

Den kontrolnan resiente:

• 180 shofùr a wòrdu di but pa falta òf uso ilegal di plachi
• 33 atvertensia a wòrdu duna
• 24 plachi falsifiká a keda konfiská
• 4 vehíkulo a wòrdu saka for di sirkulashon

Menor detené pa destrukshon

Den mes dia, polis a detené un mucha muhé menor di edat (A.B.R.A.) sospechá di destrukshon. Outoridatnan a formalisá keho i a indiká ku nan mes ta konsiderá komo partido den e kaso. E investigashon ta andando.

Entrada di polis relashoná ku estafa

Den oranan di mainta, reshèrshinan a hasi un entrada na un kas na Kaya Monseigneur Nieuwindt, relashoná ku kehonan di estafa.

Dos sospechoso a wòrdu detené:

• Un hòmber di 44 aña (S.J.J.J.)
• Un muhé hóben di 18 aña (S.Y.S.D.M.J.)

Durante e akshon, polis a konfiská diferente material ku por tin balor pa investigashon, ku ainda ta den progreso.

Detenshon despues di keho di maltrato

Riba djaluna 16 di mart, polis a intervení na Amboina despues ku un dama a reportá maltrato. Un hòmber di 24 aña (A.A.J.M.) a wordu detené un ratu despues.

E sospechoso a keda bou di aresto i a wòrdu presentá na fiskal ouksiliar. E kaso ta den investigashon.

Seri di kontrolnan di tráfiko

Den un operashon riba Kaminda Tras di Montaña, polis a kontrolá seis vehíkulo (5 outo i 1 bròmer). Resultado:

• 2 but pa falta di plachi dilanti
• 2 pa no tin reibeweis
• 1 pa no tin seguro

Un shofùr a wòrdu sankshoná pa kore 90 km/ora, loke ta 30 km/ora mas altu ku permití. Ademas, e no tabatin reibeweis ni papelnan di seguro.

Den otro kontrol na Kaya Korona, a kontrolá 19 vehíkulo (16 outo, 1 skuter i 2 bròmer):

• 5 but pa kore sin reibeweis
• 3 pa sin seguro
• 1 pa plachi falsifiká (konfiská)

Tambe a konfiská un bròmer pa falta di dokumentashon.

Outo a bòltu, pero sin herido

Riba djaluna 16 di mart, un outo a bòltu i a terminá riba su banda na Kaminda Lac despues ku e shofùr a pèrdè kontrol den un bògt.

E persona a logra sali su mes for di e outo i no a pidi asistensia médiko. Tèst di alkohòl no a mustra uso, i tur dokumento tabata na òrdu.

Advertisement