Kompania di Awa i Energia Boneiru N.V. (WEB) a anunsiá ku e tarifanan pa koriente i awa di bebe lo oumentá entrante 1 di yanüari 2026. E oumentonan di tarifa ta resultado di supsidio mas abou di e ministerionan hulandes i tarifanan di kubrimentu di gastu mas haltu ku Outoridat Hulandes pa Konsumidó i Merkado (ACM).

Riba 12 di desèmber 2025, ACM a determiná e tarifanan ku WEB por kobra for di 2026. Pa tene gastunan pagabel pa residentenan di Boneiru, WEB ta apliká pa supsidio anualmente. Sinembargo e subsidionan aki a resultá mas abou pa 2026 debi na kambio di polítika di e gabinete saliente, mientras na mes momentu WEB tin ku hasi invershonnan grandi pa kumpli ku e demanda kreciente pa awa i koriente.

Koriente
E tarifa di uso fiho pa konekshonnan di koriente te ku i inkluso 3×35 amper ta oumentá di USD 29.63 pa USD 47.80 pa luna. E tarifa variabel lo oumentá di USD 0,3220 pa USD 0,3868 pa kWh, prinsipalmente debí na kalkulashonnan siguiente di e produktor di elektrisidat Contour Global Bonaire.
Pa koriente prepagá (Pagabon), e tarifa ta subi te na USD 0.6062 pa kWh (for di USD 0.4492).

Awa di bebe
Pa e konekshon di awa di bebe mas komun (1⁄2 inch), e tarifa di uso fiho lo wòrdu oumentá di USD 0.00 pa USD 11.60 pa luna. E tarifa variabel ta oumentá di USD 4.055 pa USD 4.475 pa m3. Pa entrega via trùk di awa, e tarifa ta oumentá te na USD 5.377 pa m3.

Fakturashon i previsualisashon
Lo apliká e tarifanan nobo riba fakturanan ku un periodo di konsumo entrante yanüari 2026. Pa entrega di Pagabon i trùk di awa, e tarifanan nobo lo apliká mesora entrante promé di yanüari WEB ta enfatisá ku Tweede Kamer a adoptá un moshon dia 18 di desèmber pa investigá supsidionan adishonal. Si esaki kondusí na un presupuesto adishonal, e tarifanan por wòrdu redusí ainda.

Entrante 1 di yüli 2026, e tarifa di koriente variabel i e tarifa di Pagabon lo wòrdu reevaluá, dependiendo di e gastunan di kombustibel.

Advertisement