Papiamentu
Djárason, 28 di yanüari pa 2:00 di atardi (CET), korte na Den Haag lo duna su veredikto den e asina yamá Kaso di Klima di Boneiru. E desishon aki por bira históriko i por pone un presedente importante pa otro kasonan di klima na Europa.
E kaso aki por ta e promé den Europa kaminda un hues lo ordená un pais pa implementá maneho konkreto di adaptashon tokante kambio di klima. Si e desishon ta na fabor di e demandantenan, Hulanda lo mester hasi mas esfuerso pa protehá hende kontra impaktonan di kambio di klima, spesialmente den áreanan vulnerabel manera Boneiru.
E kaso ta presentá pa ocho habitante di Boneiru, huntu ku Greenpeace Hulanda, ku ta eksigí un maneho di klima hustu di parti di Estado Hulandes. Segun nan, Estado ta violando derechonan humano dor di no brinda sufisiente protekshon kontra konsekuensianan di kambio di klima. Pa medio di e hues, e demandantenan ta pidi ku Hulanda asumí su responsabilidat, redusí emishonnan di CO₂ te na sero mas lihé posibel, i presenta plannan konkreto pa protehá Boneiru kontra peliger manera subida di nivel di laman, inundashon i kalor.
Mundu lo ta wak atento, pasobra e veredikto aki por tin gran konsekuensia pa maneho di klima, no solamente pa Hulanda i Boneiru, pero tambe pa otro paisnan den Europa i mas ayá.
Kargando komentarionan...